البلد محتاجة ثورة يا رجاااالة ..

البلد محتاجة ثورة يا رجالة

فيه نكتة بتقول .. ان المستحيلات 16 .. وعدّد الراوي المستحيلات ال16 اللي كان من بينها ( مصري قاعد ساكت :) )

احنا شعب بنحب نتكلم و نحكي و ندردش.. ورانا ايه .. ورانا ايه ..
خلونا نتكلم بصراحة .. هيجرا ايه اما نتكلم بصراحة ؟؟
وضع البلد يا اخوانا بقى محتاج اننا نتكلم بصراحة ..

كل اما تقلب على قناة في التلفزيون .. تلاقي المذيع يقولك البلد محتاجة ثورة .. تفتح الجرايد .. تلاقي مكتوب البلد محتاجة ثورة .. ع النت .. تلاقي كل البلوجرز كاتبين ان مصر محتاجة ثورة .. يا جماعة البلد بقالها 5 سنين محتاجة ثورة .. و مصر دي امك .. و أمي برضو .. انت لما أمك بتحتاج حاجة من البقال .. مش بتجري تجيبها ؟؟ او تبعت اخوك الصغير يجيبها ؟ .. وفي الاوساط الأعلى بتطلب ديليفري .. طب دلوقتي امك محتاجة ثورة - اللي هي مصر مش أمك مرات ابوك يعني - .. هتعمل ايه بقى يا حلو ؟؟

طبعا مش هتبعت اخوك الصغير ! ..ولا الديليفري ساعتها هيسد ..
الثورة دي محتاجاك انت .. ايوه انت متبصش جنبك ..

خلونا نتكلم بصراحة .. محنا اتفقنا نتكلم بصراحة ..
المفروض تنام النهاردة .. وانت ناوي تثور .. ابدأها النهاردة وانت على سريرك و مكلفت نفسك و دافس وشك في المخدة .. قول انا هثور بكره الصبح ان شاء الله .. ونام ..
وبكره الصبح - ان شاء الله - , و انت بتشرب الشاي في الخمسينة و بتغمس فيه البسكوت ابو عجوة ..قول انا هثور ..
مهو مش انت لوحدك اللي بتثور .. انا مش ببعتك متخافش.. ده كتير من الشعب بيثور ! ..

ما الضابط اللي نازل في عز الضهرية يعملك لجنة توقف العربيات اللي اصلا الزحمة موقفاها و يلم شوية رخص من الغلابة مهو ده عامل ثورة ..

والبنات اللي نازلين من صباحية ربنا و ضاربين الجينز و الاسترتش و البودي و الميك اب .. دول نازلين يعملو (ثورة) للغلابة اللي زيي و زيك - اه بص للي جنبك مش فارقة مهو متنيل زيك :) -

والمدرسين اللي مبيشرحوش و الطلبة اللي مبيزاكروش و الدكاترة اللي مبيكشفوش و الموظفين اللي مبيشتغلوش .. ما دول كلهم بيعملوا ثورة .. و عصيان مدني .. و حالة من الغلايان الذاتي بيطلعوها في برادات الشاي وبيغمسوا فيها البقسماط اخر النهار ..

يبقى احنا رجعنا لنقطتنا .. انك لازم تثور .. وهتبتدي بكره .. تنزل الصبح لا انت هتشتغل .. ولا هتعمل حاجة في يومك اللي مش باينله ملامح ده .. وتجر في شكل خلق الله .. و اللي يكلمك تقوله ايه ؟؟
بعمل ثورة! .. عفارم عليك! ..

استأذنكم بقى عشان عندي شوية ثورة صغيرين هخلصهم و اجي ..

* * * *

خلاصة الكلام : جاء لي زبون عجوز في الصيدلية النهاردة , وسأل عن دوا, و الدوا ده اتسحب من السوق لأن الشركة باعته لشركة تانيه و الشركة التانيه مخلصتش اجراءات التصنيع لسه .. المهم الزبون اما قلتله كده , قالي : ده الدوا الوحيد اللي كنت برتاح عليه .. يقوموا يشيلوه ! .. البلد دي عايزين يعملوا فينا ايه بس ! .. ردينا و قلنا : و لسه يا عم الحج لسه ..
رد و قال: لسه ؟؟ .. انا خلاص هقابل وجه رب كريم .. الدور و الباقي عليكم انتم .. ده انتو هتشوفوا ايام سودا.. سودااا..

ومشي!

* * * *